العادة السرية لدى الأطفال - طفلك يمارس العادة السرية
 |
| العادة السرية لدى الأطفال - طفلك يمارس العادة السرية |
السلام عليكم و رحمة الله و بركاته
اولا : انا حابة احكي عن مشكلة شخصية حصلت مع حد قريب مني وبعدين هبدأ اتكلم عن المشكلة دي من وجهة نظر طبية نفسية و وجهة نظر دينية , خلينا نتكلم بكل صراحة و بلاش ندارى ورا البيوت و كأن المشكلة دي مش موجودة و لا بتواجه كل الأهالي و نبدأ نتكسف منها لحد ما للأسف المشكلة تأخذ منحنى تاني و تطور بشكل سيء.....
التجربة :
- اول حاجة...قريبة ليا ليها بنت عندها 7 سنين و قريبتي للاسف كانت بتشتغل لحد العصر فا كانت تسيب بنتها عند والدتها و ترجع تاخدها , الوقت دا كانت البنت بتلعب مع أطفال الجيران و قريبتي مكنتش مركزة معاها و مع تصرفاتها بمعنى كان في اهمال نوعا ما في وقت الاجازة بدأت قريبتي تلاحظ عليها تغيرات في شخصية البنت وانها بقت منعزلة و مبتتكلمش معاهم كتير و بتقعد وقت طويل جوة الحمام و بتسرح كتير و بتركز مع حاجات مكنتش و مينفعش تركز عليها ,, خدت بالها و لاحظتها و راقبتها و كانت المشكلة ان بنتها بتمارس العادة السرية لما بتبقى لوحدها او جوة الحمام , قريبتي اتخضت و مكنتش عارفة تعمل ايه و طلبت من والدتها ان متخرجش بنتها تلعب برة تاني مع الجيران و بدأت تبقى عصبية جدا مع بنتها و تزعقلها كتير و كانت بتفكر من خوفها كمان انها تحجبها !!!!!! طبعا تصرف قريبتي كان غلط جدا و جاب نتيجة عكسية مع بنتها لأن بنتها كانت بتعند و كانت بتعمل الموضوع دا بردو بس من وراها وكانت عندها فرصة أكبر لما مامتها متبقاش فى الشغل و عشان كدا انا كتبت الموضوع دا.
هتكلم عن العادة السرية بشكل عام عند المراهقين او البالغين .
ماذا تعني العادة السرية :في البداية لازم كمجتمع واعي نفهم يعني ايه عاده سريه , العادة السرية : هي الوصول الي النشوة من غير زواج او جماع جنسي من ناحية الذكور بيستخدم اليد وتسمى " نكاح اليد " ومن ناحية الإناث فبيستخدموا ايديهم و وضعها في المنطقة الحساسة عندهم .
العادة السرية من وجهة نظر طبية: في اقاويل انها بتسبب العقم او ضعف الانتصاب و الكلام دا مش حقيقي و مفيش اي شيء يثبت ان العادة السرية تسبب الامراض دي ، طيب الأضرار ايه ؟ بيكون ان الجهاز العصبي و التناسلي بيحصلهم ارهاق شديد بسبب تكرار العملية دي بزيادة و لكن اذا حصلت العادة السرية بمعدل قليل مبيكنش فيه خطر جسدي او اي أمراض تانية , و معنى كدا ان تكرارها بشكل مبالغ فيه بيسبب ضرر للجسد .
المشكلة الحقيقية من الناحية النفسية و المشاكل الي بتكون موجودة جوة الشخص بعد ممارسته للعادة السرية , من المشاكل النفسية :
بداية الشعور بالقلق الاخلاقي لان الشخص بيبدأ يحس انه بيعمل شيء غلط و ينعزل و يقل ثقته بنفسه, بيحس بالذنب و ميبقاش قادر يصارح حد بالموضوع او حتي يعبر عن ذاته , غير انه بيحس انه ضعيف الارادة لأن لما بيقرر عدم الرجوع لهذه العادة بيرجعلها تاني , كل دا بيسبب اضطرابات عند الشخص و مشاكل نفسية بتخليه مكتئب و منعزل و سعات عنده احساس بالنقص , هجومي و كتوم و قليل من الاشخاص الي بتتعامل مع الموضوع صح و تلجأ لمتخصص او حد ذا علم و معرفة يفيده .
العادة السرية من الناحية الدينية :
لو جينا اتكلمنا عن العادة السرية و تحريمها او عم تحريمها في الاسلام , فغير متفق علي تحريمها , بعض الأئمة حللوها و البعض حرموها و شددو عليها جدا , فاذا كنت من الأشخاص الي لا يستطيعون ترك هذه العادة مهما حاولت فاتبع اتجاه الأئمة الي حللوها عشان متوصلش لشعور انك بتعمل شيء محرم و بتعمل ذنب و انت قاصد و شعورك بالذنب يبدأ يخليك تتوقف عن ادائك لفروضك و واجباتك الدينية , و لو كنت انت من الأشخاص ال يقدرو يتغلبو علي هذه العادة ووقفها تماما فاتبع الأئمة التي تحرمها , و لكن ان تهاجم الشخص القائم علي هذه العادة و تبدأ تحسسه بانه مخطيء و يقوم بذنب عظيم فا دا شيء غلط و جهل منك .
هنا كمان الفقهاء حددو النية و الغرض من هذه العادة بمعنى اذا كنت انت من الشباب التي تحتاج لتفريغ شهوتها الجنسية و غير متزوج فمسموح و مبتكنش العادة في الوقت دا مضرة اذا كانت بمعدل بسيط وقت الاحتياج
و لو كنت لا تحتاجها و ممكن تكون بتعمل كدا للتجربة او المتعة الزائدة فقط فا شيء مضر جدا للجسد و هنا بيكون محرم , كل شخص هنا رقيب نفسه .
و طبعا بما اننا بنتكلم في الموضوع عن العادة السرية للأطفال فا مفيش اي عقوبة دينية للطفل لأنه غير واعي و غير آهل للمحاسبة ...
هنا انا حابة ارجع تاني لموضوع الطفل الذي يمارس هذه العادة , اولا الاسباب و التصرف الصح عند اكتشاف ان طفلك يمارس العادة ...
أسباب العادة السرية عند الأطفال :
اولا سبب العادة بيكون صدفة عند اغلب الاطفال لأن في الأعمار دي الطفل بيكون بيكتشف جسده و نفسه بمعنى ان صدفة بيحصل احتكاك للعضو التناسلي عندهم باي شيء خارجي او انهم يجلسوا بوضعية خطأ تسبب ليهم احتكاك ايضا فتحصل ليهم متعة مؤقتة فيبدأ الطفل انه يكرر الموضوع دا تاني عشان يحصله نفس المتعة مرة تانية .
دا السبب العادي و الطبيعي و الي بعدها ممكن الموضوع يتطور عند الطفل و يزيد .
و ممكن السبب يكون بسبب مشاهدته لشيء عن طريق الخطأ فقام بتقليده او ممكن يكون بسبب تعامله مع أحد الأطفال الي بيقوم بممارسة هذه العادة فيبدأ بتقليده .
كل دي من الأسباب و الي ساعتها بيكون مهم اوي مدى مراقبة الأم لأطفالها .
التصرف الصحيح عن اكتشاف ممارسسة الطفل للعادة السرية :
لازم نعرف كدا ان الطفل ما بيكونش قليل الأدب او منحرف اخلاقيا او عايز يتربى مثلا عشان يكون رد الفعل مخيف و هجومي و ممكن يوصل للضرب او الاهانة و دي من اكبر الغلطات الي بيقع فيها الوالدين و هما بيتعاملو مع العادة دي عند أطفالهم , الطفل يكون غير مدرك و بيكرر حركة تركت له متعة فقط , طب نعمل ايه ؟
الاب و الام هنا مينفعش انهم يسيبو الموضوع نهائي عشان ميحسش الطفل ان دا شىء مسموح او انهم يعاقبون الطفل بشكل حاد زي ما قلت فوق , لكن المفروض انهم يبدئوا يبعدوا الطفل عن الأشياء الي بتساعدو للقيام بالعادة دي , يرفضون الجلوس بوضعية غير صحيحة و يعلموهم يجلسوا ازاي صح , غير ان الأهل لازم تبدأ تشغل الطفل بألعاب تحتاج تكيز كبير زي puzzle او تكوين كلمات او تركيب بيت و هدمه تاني او تخليه يتفرج على برامج تعليمية و اشياء تخلي عقله يشتغل وذهنه مشغول .
لو بدأت تحس ان ابنك بيمارس هذه العادة حاول ان تلهيه بشكل ايجابي بأنك تاخده و من غير لفت نظره للشيء الي كان بيمارسه تبدأ تلعب معاه او تكلفه بمهمة معينة تخلي الطفل تركيزه مشغول بشيء تاني , و ألفت النظر ان الرياضة مهمة مهمة مهمة جدا يجب من المهم ان الطفل يمارس اي رياضه مناسبة ليه
لو فشل الوالدين انهم يحلوا المشكلة دي لازم في هذه الحالة يتوجهوا لمعالج مفسي و تربوي و أخصائي نفسي .
أكرر ان العقاب و نفور الأهل من الطفل بسبب شيء زي دا شيء غلط و بيدي نتيجة عكسية .
لو كان الطفل في سن أكبر من 6 سنين يننصح ان الأهل يتكلم مع الطفل بهدوء و بشكل تربوي و ديني و يبدأ يفهم الطفل ان الشىء دا غير مستحب و قد يؤذيه جسديا ليتقبل الطفل النصيحة و لا شك ان طفلك هيبدأ يقللها بالتدريج و لكن من المهم انشغاله برياضة او العاب ذهنية كما ذكرنا .
في النهاية
احب انوه ان الطفولة من أخطر و أهم المراحل العمرية الي يتوجب على الأهالي الحرص ان يكون الطفل بحالة نفسية متزنة و عدم تواجد عنده انحرافات اخلاقية او جنسية و يجب مراقبته و التقرب منه و مصاحبته , الطفل بهذه المرحلة لازم يكتسب الحنان و الرعاية الكاملة من أهله و ميخافش منهم او يتجنبهم , ادعوا لأولادنا و اطفالنا ان يكونو بصحة تامة و ان يبعد عنهم كل شر و ضرر و ان يحرسهم من اي خطر او مرض ..
